ಸಾರ್ವಜನಿಕ ಅಶಿಸ್ತಿಗೆ ಕಟ್ಟುನಿಟ್ಟು: ದಂಡ ಹೆಚ್ಚಳಕ್ಕೆ ಕೇಂದ್ರದ ಮಸೂದೆ
ನವದೆಹಲಿ, ಮಾ.30: ಸಾರ್ವಜನಿಕ ಸ್ಥಳಗಳಲ್ಲಿ ಅಶಿಸ್ತಿನ ವರ್ತನೆ ಕಡಿಮೆ ಮಾಡಲು ಕೇಂದ್ರ ಸರ್ಕಾರ ‘ಜನ ವಿಶ್ವಾಸ (ತಿದ್ದುಪಡಿ) ಮಸೂದೆ–2026’ ಅನ್ನು ತರಲು ಮುಂದಾಗಿದೆ. ಈ ಮಸೂದೆ ಸಂಸತ್ತಿನಲ್ಲಿ ಅಂಗೀಕಾರವಾದರೆ, ಸಾರ್ವಜನಿಕ ಸ್ಥಳಗಳಲ್ಲಿ ಮಲಮೂತ್ರ ವಿಸರ್ಜನೆ, ಕಸ ಎಸೆಯುವುದು ಸೇರಿದಂತೆ ಹಲವು ಸಣ್ಣ ತಪ್ಪುಗಳಿಗೆ ವಿಧಿಸುವ ದಂಡ ಹೆಚ್ಚಾಗಲಿದೆ.
ಪ್ರಸ್ತುತ Delhi Municipal Corporation Act, 1957 ಅಡಿಯಲ್ಲಿ ಸಾರ್ವಜನಿಕ ಸ್ಥಳಗಳಲ್ಲಿ ಮಲಮೂತ್ರ ವಿಸರ್ಜನೆಗೆ ₹50 ದಂಡವಿದ್ದು, ಅದನ್ನು ₹500ಕ್ಕೆ ಹೆಚ್ಚಿಸಲು ಯೋಜಿಸಲಾಗಿದೆ. ಬೀದಿಗಳಲ್ಲಿ ಕಸ ಎಸೆಯುವವರಿಗೂ ಹೆಚ್ಚು ದಂಡ ವಿಧಿಸಲಾಗುತ್ತದೆ.
ಲೈಸೆನ್ಸ್ ಇಲ್ಲದೆ ಅಥವಾ ನಿಯಮ ಉಲ್ಲಂಘಿಸಿ ಲಾಡ್ಜ್, ಹೋಟೆಲ್ ಮತ್ತು ಟೀ ಅಂಗಡಿಗಳನ್ನು ನಡೆಸುವವರಿಗೆ ಈಗ ₹100 ದಂಡವಿದ್ದು, ಅದನ್ನು ₹1,000ಕ್ಕೆ ಏರಿಸಲಾಗುತ್ತದೆ.
ಸಾರ್ವಜನಿಕ ರಸ್ತೆಯಲ್ಲಿ ಸಾಕು ನಾಯಿಗಳನ್ನು ಸರಪಳಿ ಇಲ್ಲದೆ ಬಿಡುವವರಿಗೂ ದಂಡ ಹೆಚ್ಚಿಸಲಾಗುತ್ತದೆ. ಈಗ ₹50 ಇರುವ ದಂಡವನ್ನು ₹1,000ಕ್ಕೆ ಏರಿಸಲಾಗುತ್ತದೆ. ಕಸವನ್ನು ತೆರವುಗೊಳಿಸದಿದ್ದರೆ ಮೊದಲು ಎಚ್ಚರಿಕೆ ನೀಡಲಾಗುತ್ತದೆ. ನಂತರವೂ ಪಾಲಿಸದಿದ್ದರೆ ₹500 ದಂಡ ವಿಧಿಸಲಾಗುತ್ತದೆ.
ಈ ಮಸೂದೆಯಲ್ಲಿ ಕೆಲವು ಹಳೆಯ ನಿಯಮಗಳಲ್ಲಿ ಬದಲಾವಣೆ ಕೂಡ ಮಾಡಲಾಗಿದೆ. ಕೆಲಸಕ್ಕೆ ಹೇಳದೆ ಗೈರಾಗುವ ಪೌರ ಕಾರ್ಮಿಕರಿಗೆ ಜೈಲು ಶಿಕ್ಷೆ ಬದಲಾಗಿ ₹500 ದಂಡ ಮಾತ್ರ ವಿಧಿಸಲಾಗುತ್ತದೆ. ಕಟ್ಟಡ ನಿರ್ಮಾಣಕ್ಕೆ ಸಂಬಂಧಿಸಿದ ಕೆಲವು ದಂಡ ನಿಯಮಗಳನ್ನು ಕೂಡ ತೆಗೆದುಹಾಕಲಾಗಿದೆ.
ಇನ್ನೊಂದು ಪ್ರಮುಖ ಬದಲಾವಣೆ ಎಂದರೆ, ಇಂತಹ ಪ್ರಕರಣಗಳನ್ನು ನ್ಯಾಯಾಲಯಗಳ ಬದಲು ಮುನ್ಸಿಪಲ್ ಅಧಿಕಾರಿಗಳೇ ವಿಚಾರಣೆ ನಡೆಸುತ್ತಾರೆ. 6 ತಿಂಗಳೊಳಗೆ ಪ್ರಕರಣವನ್ನು ಮುಗಿಸಬೇಕು. ತೀರ್ಪಿನ ವಿರುದ್ಧ 30 ದಿನಗಳೊಳಗೆ ಮೇಲ್ಮನವಿ ಸಲ್ಲಿಸಲು ಅವಕಾಶ ಇರುತ್ತದೆ.
ಸಾರ್ವಜನಿಕ ಸ್ವಚ್ಛತೆ ಮತ್ತು ನಿಯಮ ಪಾಲನೆ ಹೆಚ್ಚಿಸಲು ಈ ಮಸೂದೆ ಸಹಾಯಕವಾಗಲಿದೆ ಎಂದು ಸರ್ಕಾರ ತಿಳಿಸಿದೆ.
