ನವದೆಹಲಿ, ಡಿ.31: ಹೊಸ ವರ್ಷದ ಸಂಭ್ರಮದ ಮಧ್ಯೆ ರಾಷ್ಟ್ರ ರಾಜಧಾನಿ ದೆಹಲಿಯಲ್ಲಿ ಬುಧವಾರ ದಟ್ಟ ಮಂಜು ಆವರಿಸಿಕೊಂಡ ಪರಿಣಾಮ ವಿಮಾನ ಸಂಚಾರ ಸಂಪೂರ್ಣ ಅಸ್ತವ್ಯಸ್ತಗೊಂಡಿದೆ. ಇಂದಿರಾ ಗಾಂಧಿ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ (ಐಜಿಐ) ಒಟ್ಟು 150 ವಿಮಾನಗಳು ರದ್ದುಗೊಂಡಿದ್ದು, 250ಕ್ಕೂ ಹೆಚ್ಚು ವಿಮಾನಗಳು ವಿಳಂಬಗೊಂಡಿವೆ.
ಬೆಳಗಿನ ಜಾವ ಮಂಜು ದಟ್ಟವಾಗಿ ಆವರಿಸಿದ್ದು , ಸಾಮಾನ್ಯ ಸಂಚಾರಕ್ಕೂ ಅಡ್ಡಿಯಾಯಿತು. ಸುದ್ದಿಸಂಸ್ಥೆ ಎಎನ್ಐ ಹಂಚಿಕೊಂಡಿರುವ ದೃಶ್ಯಗಳಲ್ಲಿ ಮಂಜಿನ ಕಾರಣ ಬಹುತೇಕ ಏನೂ ಕಾಣದ ಸ್ಥಿತಿ ಗೋಚರಿಸಿದೆ.
ಯೆಲ್ಲೋ ಅಲರ್ಟ್ ಘೋಷಣೆ
ಭಾರತೀಯ ಹವಾಮಾನ ಇಲಾಖೆ (IMD) ಹೊಸ ವರ್ಷದ ಮುನ್ನಾ ದಿನದಂದು ಮಧ್ಯಮದಿಂದ ದಟ್ಟ ಮಂಜಿಗೆ ‘ಯೆಲ್ಲೋ ಅಲರ್ಟ್’ ಘೋಷಿಸಿತ್ತು. ಮಂಜಿನ ಪರಿಣಾಮವಾಗಿ ವಿಮಾನ ಸಂಚಾರ CAT–III ಪ್ರೋಟೋಕಾಲ್ ಅಡಿಯಲ್ಲಿ ನಡೆಸಲಾಗುತ್ತಿದ್ದು, ಇದರಿಂದ ವಿಳಂಬ ಹಾಗೂ ರದ್ದತಿ ಅನಿವಾರ್ಯವಾಗಿದೆ ಎಂದು ವಿಮಾನ ನಿಲ್ದಾಣ ಪ್ರಾಧಿಕಾರ ತಿಳಿಸಿದೆ.
ವಿಮಾನಯಾನ ಸಂಸ್ಥೆಗಳ ಎಚ್ಚರಿಕೆ
ಇಂಡಿಗೋ, ಏರ್ ಇಂಡಿಯಾ, ಸ್ಪೈಸ್ಜೆಟ್ ಸೇರಿದಂತೆ ಹಲವು ವಿಮಾನಯಾನ ಸಂಸ್ಥೆಗಳು ಪ್ರಯಾಣಿಕರಿಗೆ ಮುನ್ನೆಚ್ಚರಿಕೆ ಸೂಚನೆ (ಟ್ರಾವೆಲ್ ಅಡ್ವೈಸರಿ) ಪ್ರಕಟಿಸಿ, ವಿಮಾನ ನಿಲ್ದಾಣಕ್ಕೆ ಹೊರಡುವ ಮೊದಲು ತಮ್ಮ ವಿಮಾನದ ಇತ್ತೀಚಿನ ಸ್ಥಿತಿಯನ್ನು ಪರಿಶೀಲಿಸುವಂತೆ ಮನವಿ ಮಾಡಿವೆ. ಐಜಿಐ ವಿಮಾನ ನಿಲ್ದಾಣದ ಪ್ರಕಟಣೆಯಲ್ಲಿ, “ದಟ್ಟ ಮಂಜಿನ ಕಾರಣ ವಿಳಂಬ ಮತ್ತು ರದ್ದತಿಗಳು ಸಂಭವಿಸಬಹುದು. ಪ್ರಯಾಣಿಕರು ಸಂಬಂಧಿತ ವಿಮಾನಯಾನ ಸಂಸ್ಥೆಗಳೊಂದಿಗೆ ಸಂಪರ್ಕದಲ್ಲಿರಬೇಕು. ಉಂಟಾದ ಅಸೌಕರ್ಯಕ್ಕೆ ವಿಷಾದಿಸುತ್ತೇವೆ,” ಎಂದು ಹೇಳಿದೆ.
ರೈಲು ಸಂಚಾರಕ್ಕೂ ಪರಿಣಾಮ
ಮಂಜಿನ ಹೊಡೆತ ರೈಲು ಸಂಚಾರಕ್ಕೂ ತಟ್ಟಿದ್ದು, ಹಲವಾರು ಮಾರ್ಗಗಳಲ್ಲಿ ರೈಲುಗಳು ತಡವಾಗಿ ಸಂಚರಿಸಿದವು. ರಾಜಧಾನಿಯ ವಿವಿಧ ರೈಲು ನಿಲ್ದಾಣಗಳಲ್ಲಿ ಪ್ರಯಾಣಿಕರು ಕಾಯುತ್ತಿರುವ ದೃಶ್ಯಗಳು ಕಂಡುಬಂದವು.
ಇದರ ನಡುವೆ ದೆಹಲಿಯ ವಾಯು ಗುಣಮಟ್ಟದಲ್ಲೂ ಯಾವುದೇ ಸುಧಾರಣೆ ಕಂಡುಬಂದಿಲ್ಲ. ಕೇಂದ್ರ ಮಾಲಿನ್ಯ ನಿಯಂತ್ರಣ ಮಂಡಳಿ (CPCB) ಅಭಿವೃದ್ಧಿಪಡಿಸಿರುವ ‘ಸಮೀರ್’ ಆ್ಯಪ್ ದತ್ತಾಂಶದಂತೆ, ಬೆಳಿಗ್ಗೆ 6.05ರ ವೇಳೆಗೆ ದೆಹಲಿಯ ಒಟ್ಟಾರೆ ವಾಯು ಗುಣಮಟ್ಟ ಸೂಚ್ಯಂಕ (AQI) 383 ದಾಖಲಾಗಿದ್ದು, ಅತಿಕೆಟ್ಟ ಮಟ್ಟದಲ್ಲಿದೆ. ಇದು ತೀವ್ರ ಹಂತ ತಲುಪುವ ಅಂಚಿನಲ್ಲಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಏರ್ ಇಂಡಿಯಾ ಹೇಳಿಕೆ
ಏರ್ ಇಂಡಿಯಾ ತನ್ನ ಸಲಹೆಯಲ್ಲಿ, “ಮಂಜಿನ ಕಾರಣ ವಿಮಾನ ವೇಳಾಪಟ್ಟಿಗಳ ಮೇಲೆ ಪರಿಣಾಮ ಬೀರುವ ಸಾಧ್ಯತೆ ಇದೆ. ಕೆಲವು ಬೆಳಗಿನ ವಿಮಾನಗಳನ್ನು ಮುಂಚಿತವಾಗಿಯೇ ರದ್ದುಗೊಳಿಸಿ ಪ್ರಯಾಣಿಕರಿಗೆ ಮಾಹಿತಿ ನೀಡಲಾಗಿದೆ. ಅನಿರೀಕ್ಷಿತ ವಿಳಂಬ ಅಥವಾ ರದ್ದತಿ ಸಂಭವಿಸಿದರೆ ನಮ್ಮ ವಿಮಾನ ನಿಲ್ದಾಣ ತಂಡಗಳು ಅಗತ್ಯ ಸಹಾಯ ಒದಗಿಸಲಿವೆ,” ಎಂದು ತಿಳಿಸಿದೆ.
ದಟ್ಟ ಮಂಜಿನ ಕಾರಣದಿಂದ ಜನರ ಹೊಸ ವರ್ಷದ ಸಂಚಾರ ಗೊಂದಲಕ್ಕೆ ಒಳಗಾಗಿದ್ದು, ಪ್ರಯಾಣಿಕರು ಎಚ್ಚರಿಕೆಯಿಂದ ನಡೆದುಕೊಳ್ಳುವಂತೆ ಅಧಿಕಾರಿಗಳು ಸಲಹೆ ನೀಡಿದ್ದಾರೆ.
