BP NEWS: ಬಳ್ಳಾರಿ: ಫೆಬ್ರವರಿ.06: ಇಲ್ಲಿನ ಏಳುಮಕ್ಕಳ ತಾಯಿ ದೇವಸ್ಥಾನದ ಹಿಂಭಾಗದಲ್ಲಿ ನೂತನವಾಗಿ ನಿರ್ಮಿಸಿರುವ ಹಸಿರು ಕ್ರಾಂತಿಯ ಹರಿಕಾರ, ಮಾಜಿ ಉಪಪ್ರಧಾನಿ ಡಾ.ಬಾಬು ಜಗಜೀವನರಾಂ ಅವರ ನೂತನ ಪ್ರತಿಮೆಯನ್ನು ಸಾರಿಗೆ, ಪರಿಶಿಷ್ಟ ಪಂಗಡ ಅಭಿವೃದ್ಧಿ ಇಲಾಖೆ ಹಾಗೂ ಜಿಲ್ಲಾ ಉಸ್ತುವಾರಿ ಮಂತ್ರಿಗಳಾದ ಬಿ.ಶ್ರೀರಾಮುಲು ಅವರು ಅನಾವರಣಗೊಳಿಸಿದರು.
ಬಳ್ಳಾರಿ ಜಿಲ್ಲಾಡಳಿತ, ಹಿಂದುಳಿದ ವರ್ಗಗಳ ಇಲಾಖೆ ಸಹಯೋಗದಲ್ಲಿ ಅಂದಾಜು 1 ಕೋಟಿ ವೆಚ್ಚದಲ್ಲಿ ನೂತನವಾಗಿ ನವೀಕರಣಗೊಳಿಸಿದ ಡಾ.ಬಾಬು ಜಗಜೀವನರಾಂ ಅವರ ಭವನವನ್ನೂ ಉದ್ಘಾಟಿಸಲಾಯಿತು.
ಶಾಸಕರಾದ ಜಿ.ಸೋಮಶೇಖರರೆಡ್ಡಿ, ಬಿ.ನಾಗೇಂದ್ರ, ಮಾಜಿ ಸಂಸದೆ ಜೆ.ಶಾಂತಾ, ಜಿಲ್ಲಾಧಿಕಾರಿ ಪವನಕುಮಾರ್ ಮಾಲಪಾಟಿ, ದಲಿತ ನಾಯಕರಾದ ಎಲ್.ಮಾರೆಣ್ಣ, ಮುಂಡ್ರಿಗಿ ನಾಗರಾಜ್, ಎ.ಮಾನಯ್ಯ ಸೇರಿದಂತೆ ಹಲವು ಗಣ್ಯರು ಇದ್ದರು.
* ಸಂತೋಷ್ ಲಾಡ್ ಮತ್ತು ನಾನು ಸ್ನೇಹಿತರು. ಹೋರಾಟದ ಮೂಲಕ ನಾವು ಈ ಹಂತಕ್ಕೆ ಬಂದಿದ್ದೇವೆ. ಜಾತ್ರೆಗೆಂದು ಹೋದಾಗ ಅವರು ಭಾವುಕರಾಗಿ ನನ್ನನ್ನು ತಬ್ಬಿಕೊಂಡರಷ್ಟೇ. ಈ ಸ್ನೇಹ ರಾಜಕೀಯಕ್ಕೆ ಅತೀತವಾದದ್ದು.
ಅಮಿತ್ ಷಾ ಇದೇ ಫೆಬ್ರವರಿ 21ಕ್ಕೆ ಬಳ್ಳಾರಿ ಜಿಲ್ಲೆಗೆ ಆಗಮಿಸಲಿದ್ದಾರೆ. ಚುನಾವಣೆ ಇರುವುದರಿಂದ ಕಳೆದ ತಿಂಗಳು ಮೋದಿ ಕರ್ನಾಟಕಕ್ಕೆ ಬಂದಿದ್ದರು. ಇದೀಗ ಬಳ್ಳಾರಿಗೆ ಅಮಿತ್ ಷಾ ಬರುತ್ತಿದ್ದಾರೆ. ಹೆಚ್ ಡಿ ಕೆ ಹೇಳಿದ ಸಿಎಂ ವಿಚಾರದಲ್ಲಿ ಗೊಂದಲ ಬೇಡ. ಸಿಎಂ ಬೊಮ್ಮಾಯಿ ನೇತೃತ್ವದಲ್ಲೇ ಚುನಾವಣೆಗೆ ತೆರಳುತ್ತೇವೆ.
-ಬಿ.ಶ್ರೀರಾಮುಲು, ಜಿಲ್ಲಾ ಉಸ್ತುವಾರಿ ಸಚಿವರು. ಬಳ್ಳಾರಿ.
* ಶ್ರೀರಾಮುಲು ಗ್ರಾಮೀಣ ಕ್ಷೇತ್ರಕ್ಕೆ ಸ್ಪರ್ಧಿಸಲು ಮುಂದಾದರೆ ಅವರಿಗೆ ಸ್ವಾಗತ ಕೋರುತ್ತೇನೆ. ಕಾಂಗ್ರೆಸ್ ಮತ್ತು ಬಿಜೆಪಿಗೆ ತನ್ನದೇ ಆದ ಸಿದ್ಧಾಂತಗಳಿವೆ. ಅವರ ಸಿದ್ಧಾಂತ ಅವರಿಗೆ. ನನ್ನ ಸಿದ್ಧಾಂತ ನನಗೆ.
-ಬಿ.ನಾಗೇಂದ್ರ. ಶಾಸಕರು, ಬಳ್ಳಾರಿ ಗ್ರಾಮೀಣ ಕ್ಷೇತ್ರ.
